Uzilishlar fonida Telegramʼdan qanday foydalanish mumkin?
Rossiyada Telegramʼga kirish cheklanayotgani haqida xabarlar tarqalmoqda. Shu sababli ham messenjer faoliyatida katta uzilish yuzaga kelgan boʻlishi mumkin. Bu maqolada Telegramʼdan foydalanish yoʻllarini oʻrgatamiz.
Rasmiylar Rossiyada Telegramʼga kirishni cheklashni boshlagan boʻlishi mumkin.
Telegram avvaldan oʻrnatilgan aylanib oʻtish vositasini oʻz ichiga oladi. Uni yoqish uchun siz quyidagi amallarni bajarishingiz kerak:
- Telegram sozlamalarini oching;
- “Maʼlumotlar va disk”, keyin “Proksi” ni tanlang;
- Yangi proksi-server qoʻshing: uning manzilini, portini va turini belgilang (MTProto yoki SOCKS5);
- Proksi-server manzilini maxsus Telegram kanallarida topish mumkin. Masalan, @ProxyMTProto.
Telegramʼda proksi-serverdan foydalanishda bir qancha xavflar mavjud, jumladan, metamaʼlumotlar xavfsizligi hamda ulanish tezligi va barqarorligining pasayishi bilan bogʻliq. Jumladan,
- Metamaʼlumotlar sizib chiqishi mumkin. Agar proksi-server ishonchsiz boʻlsa, uchinchi tomon sizning maʼlumotlaringiz, IP-manzil, faol boʻlgan vaqt va boshqa koʻrsatkichlaringizni qoʻlga kiritishi mumkin.
- Tezlik pasayishi kuzatiladi. Proksi-serverdan foydalanish vaqtida internetga ulanish, fayl almashish tezligi sezilarli darajada pasayadi. Bu serverning sizdan uzoqda yoki yaqinda joylashganiga bogʻliq.
Xatarlarni minimallashtirish uchun tasdiqlangan va ishonchli proksi-serverlardan foydalanishni, sozlamalarni muntazam yangilab turishni va maʼlumotlar xavfsizligini diqqat bilan kuzatib borishni tavsiya qilamiz.
