2025-yilning yozidan Toshkentdan Issiqkoʻlga poyezd harakati boshlanadi
Oʻzbekiston temir yoʻllari Turkmaniston, Tojikiston hamda Qirgʻiziston bilan yuk tashuvlarini amalga oshirishda tariflarni pasaytirishga kelishib oldi.
5−6-noyabr kunlari Toshkentda MDHga aʼzo davlatlar temir yoʻl transporti boʻyicha kengashning 81-yigʻilishi oʻtkazildi.
Uning doirasida “Oʻzbekiston temir yoʻllari” boshqaruvi raisi Zufar Narzullayev Belarus, Qozogʻiston, Qirgʻiziston, Tojikiston, Turkmaniston hamda Eron temir yoʻl maʼmuriyatlari bilan uchrashdi.
Xususan, Turkmaniston temir yoʻllari agentligi raisi Azat Atamuradov bilan yuk tashish hajmini oshirish, temir yoʻl tashishlar uchun tariflarni uzaytirish, yuk va yoʻlovchi vagonlar parkini modernizatsiya qilish masalalarini muhokama qildi. Tranzit tashish hajmini oshirish uchun raqobatbardosh tariflarni joriy etish va vagonlardan samarali foydalanishni oshirishga kelishildi.
Belarus temir yoʻllari rahbari Valeriy Verenich bilan boʻlib oʻtgan uchrashuvda yuk vagonlaridan samarali foydalanishni kengaytirish uchun hamkorlikda marketing oʻrganishlarini amalga oshirishga kelishildi.
Tadqiqotlar doirasida bozor ehtiyojlarini aniqlash va yuk tashish samaradorligini oshirish amalga oshiriladi. Muzokaralar yakunida Oʻzbekiston va Belarus temir yoʻl maʼmuriyatlari oʻrtasida anglashuv memorandumi imzolashga kelishildi.
Eron temir yoʻllari boshqaruv raisi Jabbor Ali Zakeri ishtirokidagi muzokaralar mavzusi ikki davlat oʻrtasida yuk tashish hajmini oshirish va xalqaro transport yoʻlaklarini rivojlantirish boʻldi.
