Honor egilgan ekranli X60 va X60 Pro modellarini taqdim etdi
Honor kompaniyasi ikkita yangi smartfon — X60 va X60 Proʼni eʼlon qildi. Yangi qurilmalar X50 seriyasining vorislari boʻldi. Ishlab chiqaruvchi asosiy eʼtiborni ekranlar va kameralarga qaratdi. Batafsil maʼlumotlarni GSMArena manbasi xabar qilmoqda.
X60 Pro modeli 6,78 dyuymli egilgan OLED-ekran bilan jihozlangan boʻlib, uning yangilanish tezligi 120 Gs ni tashkil etadi. Ekranning oʻlchamlari 1224 x 2700 nuqtaga teng. Maksimal yorqinlik 3000 nitga yetadi. Qiziq tomoni shundaki, ekran hatto nam barmoqlar bilan ham teginishni aniqlay oladi - odatda smartfonlarda bu muammo boʻladi.
Qurilma Snapdragon 6 Gen 1 protsessori bilan jihozlangan boʻlib, uning quvvati 4K videoyozuv uchun yetarli. Buning uchun 108 megapikselli asosiy kamera taklif etiladi, shuningdek, 2 megapikselli chuqurlik sensori ham mavjud. Optik barqarorlashtirish tizimi yoʻq. Old kamera 8 megapikselli.
X60 modelida ham xuddi Pro versiyasidagi kabi kamera oʻrnatilgan. Biroq, barmoq izi skaneri yon tomondagi tugmaga joylashtirilgan, Pro versiyada esa u ekran ostida. Buning sababi ekran texnologiyasida — X60 OLED oʻrniga LCD panel bilan jihozlangan. Ekran diagonali 6,8 dyuym (1080 x 2412), yangilanish tezligi 120 Gs, ammo yorqinlik atigi 850 nitni tashkil etadi. X60 da Dimensity 7025-Ultra protsessori ishlatilgan.
Har ikkala smartfon ham 128, 256 yoki 512 GB xotiraga ega boʻlishi mumkin. X60 ning batareya sigʻimi 5800 mA/soatga teng, 35 Vt tezkor quvvatlash mavjud. Pro-versiya 6600 mA/soatlik batareya va 66 Vt quvvatlovchi qurilma bilan jihozlangan.
Xitoyda 8 GB tezkor xotira va 128 GB doimiy xotiraga ega boʻlgan X60 ning boshlangʻich narxi taxminan 170 dollarni tashkil etadi, xuddi shunday xususiyatlarga ega Pro modeli esa taxminan 210 dollarga baholanmoqda.
