Toshkentda Markaziy Osiyodagi birinchi shokolad muzeyi ochildi

Muzey qadimgi sivilizatsiyalardan tortib, shirinliklar olamidagi zamonaviy sanʼatgacha boʻlgan shokoladning paydo boʻlishining boy tarixini birlashtirib, tashrif buyuruvchilarga unutilmas taasurot qoldiradi.

Eksponatlar orasida Oʻzbekiston va dunyoning mashhur meʼmoriy yodgorliklarining shokolad miniatyuralari, shuningdek, taniqli tarixiy shaxslarning byustlari mavjud. Ekspozitsiyada 19 ta obyekt namoyish etilgan boʻlib, ulardan 16 tasi muzey ustalari tomonidan qoʻlda yaratilgan shokoladli haykallardir.

Haykallarni yaratish uchun 850 kilogramm shokolad ishlatilgan, asosan achchiq, ammo ikkita inshoot oq shokoladdan yasalgan. Har bir figura uchun kamida bir hafta mashaqqatli mehnat sarflandi. Barcha haykallar maxsus shokoladli lak bilan qoplangan boʻlib, bu ularni toʻgʻri saqlash sharoitida bir yilgacha asl holida saqlash imkonini beradi.

Muzey Mayya sivilizatsiyasining qadimiy ichimligidan tortib zamonaviy shokolad sanoatigacha boʻlgan shokolad tarixi hikoya qilinadigan interaktiv maydondan iborat. Bu yerda har bir obyektni nafaqat tomosha qilish, balki ushlab koʻrish mumkin.

Muzey ichida ishlab chiqarish sexi joylashgan boʻlib, u orqali tashrif buyuruvchilar shokolad ishlab chiqarish jarayoni — kakao dukkaklarini qayta ishlashdan tortib, ularni tayyor shokolad massasiga aylantirishgacha boʻlgan jarayonni kuzatishlari mumkin.

Shuningdek, yaqin kelajakda qandolatchilar rahbarligida tashrif buyuruvchilar oʻzlarining shokolad mahsulotlarini tayyorlashlari mumkin boʻlgan mahorat darslari uchun maydon ochilishi rejalashtirilgan.

Muzey dam olish kunlarisiz soat 9:00 dan 18:00 gacha ishlaydi.

Chipta narxlari:

• bolalar uchun — 50 000 soʻm;
• kattalar uchun — 75 000 soʻm;
• turistlar uchun — 100 000 soʻm.