Ozoda Nursaidova jiddiy murojaat bilan chiqdi
Xonanda Ozoda Nursaidova FTV Music Awards dasturida “Yil klipi” nominatsiyasida gʻalaba qozondi. Qoʻshiqchi shundan soʻng murojaat bilan chiqqan.
Toshkent shahridagi “Xalqlar doʻstligi” sanʼat saroyida 6-noyabr kuni FTV telekanalining musiqa ijrochilarini taqdirlash marosimi boʻlib oʻtdi.
Tadbirda oʻzbek-shou biznesining koʻplab vakillari, taniqli blogerlar va ijod ahli ishtirok etdi. Qizil yoʻlaklar, fotosessiyalar uchun maxsus joy tashkil etildi.
Konsertda soʻnggi yilning trendmeykerlari qoʻshiq kuylab, yigʻilganlar uchun ajoyib dastur taqdim etdi. Bir nechta nominatsiyalarda gʻoliblar aniqlandi.
Ozoda Nursaidovaning “Koʻk Jiguli” qoʻshigʻiga ishlangan klip “Yil klipi” deb topildi. Xonanda sahnada kichik haykalchani qabul qilib, qoʻshiq kuyladi.
Shundan soʻng sanʼatkor Instagramʼga post joylab, biroz jiddiy tarzda uni tanqid qilayotganlar javob qaytardi. Muxlislar xonanda eng yaxshi ijodkor ekanini aytgan.
“Menga shuning oʻzi va xalq eʼtirofi yetarli. Yerga urmoqchi boʻlganlar, ruhan sindiraman deganlar boʻlsa, xato qiladi!” deb yozadi Nursaidova post izohida.
Ushbu postga taniqli qoʻshiqchi Hamdam Sobirov ham izoh yozgan. “Opajon, siz afsonasiz. Aslida barcha yutuqlar sizniki edi. Hech qachon kayfiyatingizni tushirmang”, deya taʼkidlagan.
Maʼlumot oʻrnida, “Koʻk Jiguli” oʻzbek shou-biznesida fenomenal tarona hisoblanadi. Unga ishlangan klip YouTubeʼda 335 million marta koʻrilgan. Yandex, Spotify va Apple musiqiy platformalarida yetakchi oʻrinni egallagan.
