Toshkentda pulli “parkovka”lar tashkil etish uchun auksion oʻtkaziladi

Toshkent shahri hokimligi poytaxt koʻchalarida pulli toʻxtash joylarini boshqarish huquqi uchun savdolar oʻtkazmoqda. Bu haqda Spot xabar qildi.

Barcha tumanlarda ijaraga beriladigan maydonlarning umumiy hajmi 262,8 ming kvadrat metrni tashkil etadi. Bunga quyidagi koʻchalarning qismlari kiradi:

• poytaxtning markaziy qismida (jumladan, Amir Temur xiyoboni, Movarounnahr, Istiqlol, Yahyo Gʻulomov, Oʻzbekiston ovozi, Istiqbol, Sodiq Azimov, Taras Shevchenko, Shahrisabz, Yakkachinor, Shastri, Mahatma Gandi, Hamid Olimjon, Chexov va boshqa koʻchalar);
• Uchtepa va Chilonzor tumanlarida (Kichik halqa avtomobil yoʻli, Farhod, Lutfiy, Choʻponota, Muqimiy, Qatortol, Chilonzor, Arnasoy, Yesenin, Beshqayragʻoch koʻchalari);
• Sergeli va Yangihayot tumanlarida (Yangi Sergeli, Tursunzoda, Alaviya, Shokirariq, Islom Sattorov, Qipchoq, Qoʻrgʻontepa, Birodarlik koʻchalari);
• Olmazor va Shayxontohur tumanlarida (Labzak, Sebzor, Gulobod, Forobiy, Beltepa, Qoraqamish, Qorasaroy, Shimoliy Olmazor koʻchalari);
• Bektemir tumanida (Husayn Boyqaro koʻchasi);
• Mirobod tumani (Yangi Qoʻyliq koʻchasi);
• Yashnobod tumanida (Ohangaron yoʻli koʻchasi, Quyi Talariq, Sives, Quruvchilar koʻchalari).

Ijara muddati 3 yilni tashkil qiladi. Dastlabki ikki yil ichida ijarachi avtoturargohlarni jihozlash, parkomatlar va harakatni tashkil etish vositalarini oʻrnatish, shuningdek, kommunikatsiya va aloqani amalga oshirish uchun kamida $5 mln sarmoya kiritishi kerak.

Avtoturargohdan tushgan tushumning kamida 1/12 qismi Toshkent shahar yoʻl-transport infratuzilmasini rivojlantirish jamgʻarmasiga oʻtkazilishi kerak. Bundan tashqari, ijarachi avtoturargohlardan maqsadli va qonuniy foydalanish monitoringini taʼminlashi kerak.