Xiaomi katta ekranli va 120 Gs yangilanish tezligiga ega arzon Redmi 14C smartfonini taqdim etdi

Koʻplab maʼlumotlar tarqalganidan soʻng Xiaomi rasman arzon Redmi 14C smartfonini eʼlon qildi. Qurilma butunlay yangi dizayn, katta ekran va sigʻimli batareyaga ega boʻldi.

U 1640 x 720 piksel aniqlikdagi va 120 Gs yangilanish tezligiga ega ulkan 6,88 dyuymli LCD displey bilan jihozlangan. Eng yuqori yorqinlik 600 nitni tashkil etadi. Paneldagi tomchisimon kesimga 13 megapikselli selfi-kamera oʻrnatilgan.

Smartfonning asosini MediaTekning Mali-G52 MC2 grafik protsessori bilan toʻldirilgan Helio G81 Ultra SoC chipi tashkil etadi. Tezkor xotira hajmi konfiguratsiyaga qarab 4/6/8 GB, doimiy xotira esa 128 yoki 256 GB ni tashkil qiladi. Uni microSD karta sloti yordamida kengaytirish mumkin.

Orqa panelda 50 MP asosiy kamera va vazifasi koʻrsatilmagan yordamchi obyektiv joylashgan. Portret va tungi suratga olish rejimlari mavjud. Foydalanuvchilar turli xil filtrlardan, jumladan, video uchun ham foydalanishlari mumkin.

5160 mA·soat sigʻimli akkumulyator 18 vattli zaryadlashni qoʻllab-quvvatlaydi. Yon paneldagi barmoq izi skaneri va quloqchinlar uchun ulagich saqlanib qolgan. Kontaktsiz toʻlovlar uchun NFC moduli ham mavjud.

Redmi 14C toʻrtta rangda: qora, yashil, binafsha va koʻk ranglarda taqdim etilgan. Narxlar hozircha rasman eʼlon qilinmagan, ammo qurilma allaqachon Chexiyadagi chakana savdo doʻkonlarida paydo boʻlgan. U yerda asosiy versiya 3000 chex kronasiga (taxminan 1 million 700 ming soʻm), eng yuqori versiya esa 3700 chex kronasiga (taxminan 2 million 100 ming soʻm) baholanmoqda.