Abbosbek Fayzullayev gol urgandan soʻng turli qoʻl ishoralari qilmoqda. Bu harakatlar nimani anglatadi?

Oʻzbekiston terma jamoasi aʼzosi, Moskvaning “SSKA” klubi hujumchisi Abbosbek Fayzullayevning qoʻl harakatlari muhokamalarga sabab boʻlmoqda.

U terma jamoa safidagi soʻnggi ikki uchrashuvda, jumladan, Qatar va Shimoliy Koreya bilan bahsda anime qahramonlarining qoʻl harakatini takrorladi.

Oʻz oʻrnida, bu ishoralar muxlislar orasida turli muhokamalarga sabab boʻldi. Ayrimlar bu hech qanday yomon ish emasligini aytsa, boshqalar bunday qilmaslikni soʻragan.

Abbosbek qanday harakatlarni bajardi va ular qanaqa maʼno anglatadi?

Futbolchi intervyularidan birida anime olamini yoqtirib qolganini va doimiy ravishda shunday multfilmlar koʻrib borayotganini aytgan. U postlar ostida ham “Naruto”dan iboralar yozib qoldirmoqda.

Shundan kelib chiqilsa, Fayzullayev golni sevimli filmidagi sevimli qahramoniga taqlid qilgan holda nishonlayapti, deyishimiz mumkin. Bu fikrni u eʼlon qilgan post ostida yozilgan izohlarda ham koʻrish mumkin.

“Yoʻlbars” belgisi

Qatarga qarshi kechgan bahsda Abbosbek Fayzullayev ikkita golga mualliflik qildi va jamoani oʻta murakkab vaziyatdan qutqarishiga bir bahya qolgandi. U gol urib boʻlgach, barmoqlarini birlashtirib, “yoʻlbars” ishorasini qildi.

Odatda olov va yer unsurlari bilan bogʻliq boʻlgan bu belgi Xitoy zodiak yoʻlbarsiga asoslangan. “Naruto”dagi Saske koʻpincha oʻz klanining oʻziga xos olovli dzyutsu texnikasini bajarishda undan foydalangan.

Shadow Clone jutsu

Hujumchi Shimoliy Koreya bilan javob uchrashuvida hal qiluvchi yagona golga mualliflik qildi va endi bu safar Narutoning oʻziga tegishli qoʻl ishorasini qildi. U bu orqali jamoadoshlarini chaqirgan boʻlishi mumkin.

Chunki mangada bu harakat klonlashgan odamlar Naruto atrofida toʻplanadi va ularning barchasiga kuch teng taqsimlanadi. Klonlar ham oʻz tajribasini ishorani qilgan ninza bilan telepatiya yordamida boʻlisha oladi.

“Naruto” loyihasi haqida

“Naruto” Masashi Kishimoto tomonidan yaratilgan yapon mangasidir. Film mazmuni oʻz qishlogʻida eng kuchli (Hokage) deb tan olinishini istovchi ninza Naruto Uzumaki va uning doʻstlari bilan sodir boʻluvchi voqealar hikoyasidan iborat.

Manga 21-sentyabr 1999-yildan 10-noyabr 2014-yilgacha Shueisha yapon nashriyoti tomonidan Weyekly Shonen Jump jurnalida chop etilgan. Manga asosida Aniplex va Studio Piyerrot kompaniyalari tomonidan anime-teleserial suratga olingan. “Naruto” Yaponiyada 205 million nusxada sotilib, bestseller mangalar qatoriga kirgan.