Farzandingiz ulgʻayguncha koʻrsatish kerak boʻlgan eng yaxshi multfilmlar roʻyxati

Mana eng yaxshi multfilmlar, ularning har biri oʻz hikoyasini soʻzlaydi, bolalar esa uni oʻzlarida sinab koʻrishlari va koʻp yangi narsalarni oʻrganishlari mumkin.

Etik kiygan mushuk 2: Soʻnggi tilak / Puss in Boots: The Last Wish, 2022 (AQSH)

Etik kiygan mushuk deyarli barcha umrini sarflagan, 9 tadan atigi 1 tasi qolgan. Shunga qaramay, qahramonimiz afsonaviy soʻnggi tilagini topish va barcha yoʻqotgan hayotlarini qaytarib olish uchun yangi qiziqarli sarguzashtga otlanadi.

Etik kiygan mushuk bolalarga chaqqonlik va zukkolik hayotda muvaffaqiyatga erishishga yordam berishini ham oʻrgatadi.

Balerina / Ballerina, 2016 (Fransiya, Kanada)

Balerina multfilmining syujeti oʻz orzusi - raqqosa boʻlish orzusidagi yetim qiz atrofida rivojlanadi. U Parijning mashhur maktabiga keladi, lekin orzusiga erishish yoʻli oson boʻlmaydi.

Asarning asosiy gʻoyasi: nafaqat oʻzingizga yoqqan narsani qilish, maqsad sari intilish, balki haqiqiy istaklaringiz nimada ekanligini tushunish ham muhimdir. Yana shunisi ham muhimki, mashgʻul boʻlgan ishingiz boshingni aylantirib, boshqalarga yuqoridan qarashga majbur qilmasligi kerak.

Qoyada yashovchi Ponyo baligʻi / Ponyo on the Cliff by the Sea, 2008 (Yaponiya)

Sehrgar va dengiz maʼbudasining qizi boʻlgan kichkina qiziquvchan Ponyo baligʻi oʻz uyidan suzib chiqib, odamlar dunyosiga tushib qoladi. U kichkintoy Sooske bilan doʻstlashishga muvaffaq boʻladi va endi baliq faqat bir narsani - odam boʻlishni xohlaydi.

Ushbu multfilmdagi hamma narsa yaxshilik, sabr-toqat, dunyoga ochiqlik hamda doʻstlik va oʻzaro yordam tushunchasini oʻrgatadi.

Taʼtildagi maxluqlar / Hotel Transylvania, 2012 (AQSH)

Graf Drakula boshchiligidagi juda xarizmatik maxluqlar begona koʻzlardan yashiringan mehmonxonada yashamoqdalar. Drakula sevimli qizini tarbiyalaydi, uni dushmanona dunyodan himoya qiladi. Biroq hamma joyda hozir boʻlgan sayyohlar mehmonxonaga kirib qoladilar va bir maromdagi hayot izdan chiqadi.

Multfilm bolalarga insonni tashqi koʻrinishiga qarab baholamaslik kerakligini tushunishga yordam beradi, chunki eng muhimi uning ichki dunyosidir. Oila - hayotimizdagi eng qadrli narsa, lekin bolalar va ota-onalar har doim ham bir-birini tushunishmaydi. Bolalar ota-onalarining ortiqcha gʻamxoʻrligini kechirishlari, ota-onalar esa oʻz farzandlariga koʻproq erkinlik berish kerakligini tushunishlari lozim.

Omad / Luck, 2022 (AQSH, Ispaniya)

Sem Grinfild — koinotdagi eng omadsiz qahramon. Taqdirning kutilmagan burilishida u ajoyib Omad mamlakatiga tushib qoladi va u yerda oʻz omadini qaytarish uchun ajoyib sehrli mavjudotlar bilan birlashadi. Sehr-jodu va sarguzashtlarga boy bu hayajonli voqea hech kimni befarq qoldirmaydi.

Multfilm shuni oʻrgatadiki, baʼzan omadsizliklar kuchliroq boʻlish va istalgan narsaga erishish uchun zarur boʻladi.

Sening isming / Your Name, 2016 (Yaponiya)

Tokiolik yigit va qiz haqidagi hikoya oʻsmirlarga yoqadi. Yoshlar ular oʻrtasida gʻalati va tushuntirib boʻlmaydigan bogʻliqlik borligini payqaydilar. Tushda ular tanalarini almashtiradilar va bir-birlarining hayotlarini yashaydilar. Ammo bir kuni bu qobiliyat yoʻqoladi va ular nima boʻlganini aniqlashga qaror qilishadi.

Multfilm tomoshabinlarga tasodif hayotda qanday rol oʻynashi, haqiqiy muhabbatni qanday farqlash va nima uchun vaqt chin tuygʻularga hamda yoshlikning yorqin stixiyasiga qarshi ojiz ekanligi haqida oʻylashga imkon beradi.

Paranorman yoki zombilarni qanday oʻrgatish mumkin / ParaNorman, 2009 (AQSH)

Butun kichkina shaharcha Normanga umid bogʻlagan. Axir uning gʻayrioddiy qobiliyati bor — aholini bezovta qilayotgan arvohlar bilan muloqot qilish qobiliyati. Faqat u qadimiy laʼnatni bekor qilishga qodir.

Biroz vahimali multfilm muhim muammoni yetkazish uchun asablarni qitiqlaydi: biz tushunmagan narsadan qoʻrqamiz va oʻylamasdan qoʻrqqan narsamizni yoʻq qilishga harakat qilamiz. Baʼzida esa shunchaki yordam qoʻlini choʻzish va hamdardlik bildirish kifoya.