АҚШда қанча пул ишлаб топишади: турли касбларнинг ойлик маошлари

АҚШнинг 2023-йилги иш ҳақи маълумотларини тўпладик.

IT саноати: мия фаолияти учун катта маош

Дастурчи. АҚШдаги дастурчиларни “дунёнинг тепасида” дейиш мумкин. Дастурчининг ўртача ойлик маоши тахминан 7,500$ бўлиб, кўпчилик бундан ҳам кўпроқ пул топиши мумкин. Сунъий интеллект ёки киберхавфсизлик каби махсус кўникмаларга эга бўлган мутахассислар ойига 8,000$ дан 12,000$ гача пул ишлашлари мумкин.

Тизим маъмури. Тизим маъмурлари ташкилотларнинг ИТ инфратузилмасини таъминлайди. Тизим маъмурларининг ўртача ойлик маоши тахминан 5,500$. Компаниянинг катталиги ва тажриба даражасига қараб, ойлик ҳар хил бўлиши мумкин.

Соғлиқни сақлаш: мутахассислар учун юқори даромад даражаси

Шифокор. АҚШдаги шифокорлар барча касблар орасида энг юқори маошга эга. Шифокорнинг ойлик маоши мутахассислигига қараб 8,000$ дан 12,000$ ва ундан юқори бўлиши мумкин. Масалан, кардиолог ва жарроҳлар ушбу диапазоннинг юқори қисмида пул ишлашади.

Ҳамшира. Ҳамширалар ҳам катта даромадга эга. Ўртача ойлик иш ҳақи тахминан 6,000$ ни ташкил қилиб, тажриба ва жавобгарлик даражаси ошиши билан, ушбу кўрсаткич ҳам ошиши мумкин.

Таълим: ўқитувчи ва профессорлар

Бошланғич синф ўқитувчиси. Бошланғич синф ўқитувчилари ойига 3,500$ - 4,500$ атрофида пул ишлашади. Иш ҳақи нисбатан паст бўлишига қарамай, кўпчилик бу касбни ўқитишга бўлган муҳаббат ва келажак авлодга ҳисса қўшиш истаги туфайли танлайди.

Университет профессори. Университет профессорлари жуда яхши пул ишлашлари мумкин. Профессорнинг ўртача иш ҳақи тахминан 6,500$ - 8,000$. Нуфузли университет ва грантлар билан бу кўрсаткич янада юқори бўлиши мумкин.

Молия сектори: таҳлилчи ва брокерлар учун катта маош

Молиявий таҳлилчи. Молиявий таҳлилчилар инвестицияларни баҳолайди ва тавсиялар беришади. Ўртача ойлик иш ҳақи тахминан 6,500$. Компания, тажриба ва минтақага қараб, даромад 9,000$ ва ундан юқори бўлиши мумкин.

Инвестиция банкири. Катта битим ва бирлашмалар билан ишлайдиган инвестиция банкирлари ойига 10,000$ дан 20,000$ гача пул ишлашлари мумкин. Ушбу мутахассислар кўпинча интенсив шароитларда ишлайди, аммо шунга яраша ойлик олишади.

Юридик сектор: адвокат ва нотариуслар

Адвокат. АҚШдаги адвокатлар ойига ўртача 6,000$ дан 10,000$ гача даромад олишади. Компаниянинг ихтисослиги, тажриба ва ҳажмига қараб, бу рақамлар сезиларли даражада фарқ қилиши мумкин.

Нотариус. Нотариуслар камтарона даромадга эга, аммо уларнинг ишини эътиборсиз қолдириб бўлмайди. Нотариуснинг ўртача ойлик маоши тахминан 4,000$.

 Савдо ва мижозларга хизмат кўрсатиш: реал одамларнинг реал даромадлари

Савдо менежери. Савдо менежерлари ойига ўртача 4,500 доллар ишлаб топади. Ушбу соҳада кўп нарса савдо муваффақиятига боғлиқ, шунинг учун бонус ва комиссиялар даромаднинг умумий миқдорини сезиларли даражада ошириши мумкин.

Кассир. Кассирларнинг иши кўпинча паст баҳоланади, аммо бу зарур касб. АҚШда кассирнинг ўртача иш ҳақи ойига тахминан 2,500 долларни ташкил қилади.

Қурилиш ва ишлаб чиқариш: ишчи касблар ҳам муҳим ҳисобланади

 Қурувчи. Қурилиш ишчилари малака ва иш жойига қараб ойига ўртача 3,500$ дан 5,000$ гача даромад олишади. Бу рақам электр ёки сантехника каби муайян иш турлари бўйича мутахассислар учун юқори бўлиши мумкин.

Ишлаб чиқаришдаги ишчи. Ишлаб чиқаришдаги ишчининг ўртача ойлик иш ҳақи тахминан 3,200 долларни ташкил қилади. Малака ва тажрибага қараб, даромад миқдори фарқ қилиши мумкин.

Транспорт ва логистика: мобил даромад

Юк машинаси ҳайдовчиси. Юк машина ҳайдовчилари ойига ўртача 4,000 дан 6,000 долларгача пул ишлашади. Ушбу касбда тажриба ва кўникмалар, шунингдек, узоқ сафарларга тайёрлик юқори баҳоланади.

Омбор ходими. Омбор ишчилари ойига тахминан 2,800 доллар ишлаб топишади. Қўшимча смена ва тунги навбатчилик туфайли даромад кўпайиши мумкин.

Шундай қилиб, АҚШдаги кўплаб касблар катта даромад келтиради, аммо маълум даражадаги малака ва тажрибани талаб қилади. Олий маълумот ва ихтисослаштирилган кўникмаларга эга бўлиш ушбу соҳаларнинг ҳар қандай даромадини сезиларли даражада ошириши мумкин.