Ой сарҳисоби: Сентябрда Ўзбекистонда ва дунёда нималар содир бўлди?

Муаллиф

Сентябрь ойи ҳам якунига етди. 2024 йилнинг тўққизинчи ойи қизғин воқеаларга бой бўлди. Toping.uz сентябрнинг энг муҳим ва диққатга сазовор янгиликларини бир мақолага жамлади.

Ўзбекистон ва жаҳонда сентябрь ойи янгиликларга бой бўлди. Бу ойни ўқувчилар айниқса янги iPhone чиқиши ва Hamster Kombat токенлари листинги билан кўпроқ эслаб қолишди. Апплеънинг янги маҳсулоти яна аввалгиларидан унчалик фарқ қилмади, HMSTR токенлари эса ўйинчиларга арзимас чақага айланди.

Паралимпия ва Шахмат олимпиадаси

Сентябрь яхши хабарлар билан бошланди. Ўзбекистон паралимпиячилари тўртйилликнинг энг нуфузли мусобақасида медаллар шодасини қўлга киритди. Президент Париж паралимпиадаси совриндорлари билан учрашувда 2028 йилги ўйинларга ҳозирданоқ тайёргарлик кўриш кераклигини айтди.

Ўзбекистон Паралимпия ўйинларини 26 та медаль — 10 олтин, 9 кумуш ва 7 бронза қўлга киритиб, 168 делегация орасида 13-ўринда якунлади. Бу мамлакат тарихидаги энг яхши натижа, шунингдек, Осиёда 3-ўрин, туркий, ислом давлатлари ва МДҲ давлатлари орасида эса 1-ўрин.

Венгрия пойтахти Будапешт шаҳрида бўлиб ўтган 45-бутунжаҳон шахмат Олимпиадасида бронза медалларни қўлга киритган Ўзбекистон эркаклар жамоаси аъзолари «Президент совғаси» сифатида BYD Chazor русумидаги автомобиллар ҳамда 170 миллион сўм пул мукофоти билан тақдирланди.

Ушбу мусобақада амалдаги чемпионлар сифатида қатнашган Ўзбекистон жамоаси 17 очко билан учинчи ўринни қўлга киритди. Мусобақа ғолиби Ҳиндистон 21 очко тўплади. Кумуш медалларга эга чиққан АҚШ Ўзбекистон термасидан фақатгина қўшимча коэффициентлар эвазига ғалаба қозонди.

Apple iPhone 16 линияси смартфонларини тақдим этди

9 сентябрь куни Apple компанияси анъанавий янги маҳсулотлар тақдимотини ўтказди. Тақдимот ўзгача кўринишда бўлди: Тим Кук бошчилигидаги компания мутахассислари саҳнада эмас, очиқ ҳавода янги қурилмалар ҳақида гапириб берди.

Янги iPhone 16 смартфони қора, пушти, яшил, оқ ва кўк рангларда чиқарилиши маълум қилинди. Смартфон Apple Intelligence сунъий интеллектига эга. Камерани бирор нарсага қаратинг ва iPhone сизга ўша нарса ҳақида барча маълумотни тақдим қилади.

Шунингдек, тақдимотда Apple Watch Series 10 ва AirPods 4 ҳам намойиш этилди. Эндиликда янги авлод Apple AirPods қулоқчинлари билан қўнғироқларга бошингизни қимирлатиб жавоб беришингиз мумкин. Соатнинг ҳошияси янада юпқароқ кўринишга эга бўлади.

Hamster Kombat ўйинига оид барчаси

Ярим йилдан бери ҳамма ишни йиғиштириб, экрандаги оғмахонни босганлар 26 сентябрь куни бойиб кетишини кутиб яшади. Бунга Notcoin ўйини сабаб бўлди дейиш мумкин. Чунки ўшанда ўйинчилар анчагина яхши даромад ишлаб топишганди.

Аммо Hamster билан ҳаммаси аксинча бўлди. Энг машҳур ўйинчилар (одатда блогерлар, чунки улар аудиториясини ўз ҳаволаси орқали ўйинга жалб қилиб, кўплаб токенларни қўлга киритди) зўрға 2-3 минг доллар ишлади. Шу ўйинда кўп вақтини ўтказганлар бўлса, ўртача 25-30 доллар пул топди.

Криптовалюта бозори таҳлилчилари буни олдиндан башорат қилишганди. Чунки Hamster раҳбарияти орасида ички зиддиятлар кучайган, улар инвесторлар билан ҳам келишмай қолишганди. Аммо энг асосий сабаблардан бири бу ўйинчилар сонининг ҳаддан зиёд кўплигида эди. Уларнинг ҳаммаси миллионер бўлиб кетмаслиги табиий ҳол.

Истиқболли лойиҳалар миллий агентлиги Ҳамстер Комбат ўйинидан олинган HMSTR токенларини фақат рухсат этилган криптобиржа ва криптодўконда сотиш мумкинлигини маълум қилди. Криптоактивлар айланмаси қоидаларини бузганлик учун маъмурий ва жиноий жавобгарлик назарда тутилганини эслатди.

Лирик чекиниш

Ой давомида сайтимизда бир қанча қизиқарли ва таҳлилий мақолалар эълон қилинди. Уларни балки кўрмай қолгандирсиз ёки кейинроқ ўқийман деб сақлаб қўйгандирсиз. Шу сабабли ўзимиз долзарб мақолалардан иборат тўпламни тайёрладик.

Фильмлар, сериаллар, анонс ва трейлерлар

Кутилганидек, йил якунига келиб, деярли барча кино компаниялари фаоллашиб қолди. Энди яна кинотеатрлар томошабинларга тўлади. Чунки октябрь том маънода премьералар ойи бўлади. Шунингдек, узоқ кутилган сериаллар премьерасига ҳам оз қолди.

Ой бошида «Джокер: Икки кишилик телбалик» фильми янги тизери тақдим этилганди. Фильм 2 октябрь куни халқаро кинопрокатга чиқади. Асл «Джокер» фильми 2019 йилда экранларга чиқиб, 1 миллиард доллардан ортиқ даромад келтирган.

Шунингдек, режиссёр Шон Бейкернинг Бруклиндаги фоҳиша ҳаёти ҳақидаги фильми премьераси бўлиб ўтди. «Анора» фильми бу йилги Канн кинофестивалининг «Олтин пальма япроғи» мукофотига сазовор бўлган. Сюжет Бруклиндаги фоҳиша Ани ҳаёти атрофида ривожланади. Қиз тўсатдан рус олигархининг ўғли Иванга турмушга чиқади.

Нетфлих «Калмар ўйини» сериалининг янги мавсумига оид тизерни тақдим этди. Сон Ги-хун (456-рақамли ўйинчи) бош ролига «Эмми» мукофоти совриндори Ли Жон-дже қайтди. Шунингдек, видеода янги иштирокчиларни кўриш мумкин, бироқ уларнинг юзлари кўрсатилмаган. Иккинчи мавсум премьераси Netflixʼда 2024 йил 26 декабрда бўлиб ўтади.

Peacock стрим-сервиси «Ажабтовур ишлар» услубидаги «Жазава!» сериалининг кенгайтирилган трейлини тақдим этди. Релиз 18 октябрь куни бўлиб ўтади. Шоу сюжети 1980 йилларда кичик шаҳарчада содир бўлади. Ўсмирлар хеви-метал-гуруҳи ўзларини сатанистлар деб эълон қилади: барча севган ёш квотербек йўқолганда, шаҳар аҳолиси оккультизм ҳақида кўпроқ била бошлайди, бу эса даҳшатли оқибатларга олиб келади.