Таниқли автоблогер Камила Русесян тавсия қилган 4 автомобиль

Автоблог юритишни бошлашга нима туртки бўлди?

Автоянгиликлар мавзусида блог юритишга кўчаларда JDM (Japanese domestic market) услубидаги кўпроқ кора бошлаганим туртки бўлган. Ушбу соҳада видеолар тайёрлашни дастлаб йигитим бошлаган. Бора-бора менда ҳам қизиқиш уйғонган.

Бундан ташқари, дадам ҳам, онам ҳам доим рулда бўлган. Умуман олганда, менинг атрофимдаги барча инсонлар машина бошқарган ва мен ҳам кичик ёшимданоқ автомобиллар фарқига борардим.

Шу боис автомаданиятнинг бир қисми бўлишга қарор қилдим ва вақт ўтавергач, ривожланиб, обуначиларим сони ортиб бораверди. Айни вақтда фаолиятимни юқори қизиқиш ва фахр билан давом эттирмоқдаман.

Биринчи бўлиб қайси машинани бошқаргансиз?

Бу дамларни кечагидек эслайман. Биринчи машинам Chevrolet Spark бўлганди. Автомобилни харид қилиш жараёни ҳам жуда тезлашиб кетган. Хоссатан, эрталаб ишга кетаётганда ўша эълонни кўргандим ва кечқурун уйга қайтганда эса Spark`ни бошқариб келганман.

Бу ўта фавқулодда қарор бўлган деб айта оламан. Нимага айнан Spark? Чунки биринчи машина учун у жуда ҳам муқобил танлов. Қулай, чаққон ва камхарж. Тойчоқни олишим билан уни тюнинг қилиш ҳақида ўйлай бошладим. Аммо бунга жуда кўп пул кетиши турган гап эди.

Яхшиямки, GM машиналарига иномаркаларга қараганда камроқ харажат қилинади. Умуман олганда, янги ҳайдовчилар учун Spark қулай, ҳамёнбоп ва ўта зукко машинадир. Мен ўз Spark`имда бутун Ўзбекистонни кезиб, турли мусобақаларда қатнашганман ва совринли ўринларни эгаллаганман.

Spark ўзининг ноёб дизайни ва жуда ҳам кам эътибор талаб қилиши билан бутун республикада кенг тарқалгани автомобиль бўлса керак, деб ҳисоблайман. Айни дамда менда иккинчи машина бўлса ҳам, Spark гаражимда туради. Уни доим фаолиятимдаги энг ёрқин юлдуз сифатида кўраман.

Соҳадаги стереотиплар билан қандай курашяпсиз?

Фаолиятим эндигина бошланганда жуда ҳам кўп қийинчиликларга дучор бўлганман. Мен машинамни автотюнинг қилгач, уни Instagram`га юклашдан жуда қўрққанман. Вақтлар ўтиб, Blondinka Angelina исмли россиялик автоблогер менинг кумиримга айланди.

Мен унинг видеоларини томоша қилиб, ўзимга кичкина хулоса олганман: одамлар бутун умр гапиришади, шу сабаб ҳозир ёки ҳеч қачон деган гапга амал қилиш керак. Шукрки, автодоирада мени жуда илиқ кутиб олишди. Мен Тошкент ва бошқа ҳудудлардаги автоишқибозлар билан доимий мулоқотдаман.

Биз улар билан турли фестиваллар, мусобақаларда учрашиб туради. Уларнинг барчаси мени қўллаб-қувватлайди, тушунмаганларимни ўргатишдан қочмайди. Биз биргаликда турли видеоколлаблар ҳам ишлаб турамиз. Мен танишларим билан биргаликда автожамоа ҳам шакллантиришга улгурдим.

Ўзига хосликнинг афзал томонлари нимада?

Мен Spark автомобилимни ҳеч кимникига ўхшамаган ҳолда қайта безашни хоҳлаганман. Қийинчиликлар нафақат тюнинг жараёнида, балки блог юритиш давомида ҳейт шаклида ҳам бўлиб турган. Дастлабки пайтларда бу мени жуда ҳам қийнаган.

Аммо мен қаҳри қаттиқ қиз бўлганим боис йўлимда давом этавердим. Мен доим одамлар машинамнинг тюнинг қилинишига ҳавас билан боқишини ва бундай жараёнларни доимий равишда томоша қилишини хоҳлаганман. Айнан шу менга бошқаларни тингламасдан, олдинга интилишга туртки берган.

Автомобилсозлик саноатидаги трендлар ҳақида фикрингиз

Жуда кўп ва хўп фестиваль ҳамда мусобақаларда қатнашган мутахассис сифатида айта оламанки, Ўзбекистонда автотюнинг, умуман, автомобилсозлик саноат соҳасида тезлик билан ривожлана бошлади. Мен бундан фақатгина хурсандман.

Айнан JDM услубидаги тюнинг хизмати ҳам тезда ривожланиб бормоқда. Бундай технологиялар мени хушнуд қилади. Автоҳаваскорлар ўзига хос йўл билан машиналарга янги ҳаёт бағишлаётганини кўриб хурсанд бўламан.

Бу соҳада пул катта, шу билан бирга, унга катта сармоя сифатида ҳам қараш мумкин. Аммо бу иш жуда кўп меҳнат ва сабрни талаб қилади. Мен бундан ҳам кўпроқ тадбирлар ташкил этилиши ва у ерда йирик форумларда автоблогерлар иштирок этишини хоҳлардим.

Блоггингга қизиқадиган қизларга қандай маслаҳатлар берасиз?

Ҳеч нимадан қўрқмаслик керак. Масалан, мен бюти ёки фудблогер бўлганимда бирор ҳадиксиз ишимни бошласам бўларди. Аммо Ўзбекистонда автоблоггингда ҳали бирорта ҳам қиз йўқ эди. Мен соҳада биринчилардан бўлганман. Шу сабаб бир нарсани айта оламан, бу ишларни аввалроқ бошлашим ҳам мумкин эди. Бунга фақат қўрқув қаршилик қилган.

Фақат ҳаракат, ҳаракат, ҳаракат. Шундагина бирор натижага эришиш мумкин. Нимадан бошлашни билмаётган қизлар бўлса, бемалол мурожаат қилишлари мумкин. Ҳозиргача бир қанча ҳаваскорлар ёзган ва менга ҳавас қилиб, Спарк сотиб олишганини айтишган. Мен ҳам ўз навбатида, уларга билимларимни улашишдан қочмайман.

Ўзбекистондаги машиналардан энг кўп қайсиларини ёқтирасиз?

Айни вақтда ўзбек автобозорида топиш мумкин бўлган тўрт автомобилни санаб ўтаман. Буларнинг иккитаси, албатта, Spark ва Gentra. Бундан ташқари эса, юқори тоифага қарайдиган бўлсак, BMW М5 F90 ва Nissan GT-R.

Электромобил ёки бензинли автомобиль: қайсини танлаш керак?

Менинг танловим — фақатгина бензинли автомобиль. Шахсан мен машинада овозсиз юра олмайман ва кўпчиликнинг айтишича, қандайдир нурланиш ҳақида эшитганман. Электромобиллар жонсизга ўхшайди. Ҳа, бу, шубҳасиз, тежамли, экологик ва қулай, лекин мен ҳеч қачон электр ёки ҳатто гибрид сотиб олмаган бўлардим.

Мен, автоблогер сифатида, кучли тутун чиқадиган, мотор шовқини ва қалбга эга бўлган овозли автомобилларни яхши кўраман ва бу ҳолда ишлаб чиқариш ва яхшилаш истаги пайдо бўлади. Электромобиллар биздан катта одамларга, уларга керак бўлган қулайлик учун кўпроқ мос келади.