Oʻzbekistonda MMA boʻyicha yoshlar va oʻsmirlar oʻrtasidagi jahon chempionati boshlandi
5−10-noyabr kunlari Toshkentdagi Humo arena muz saroyida aralash jang sanʼati sport turi (MMA) boʻyicha yoshlar va oʻsmirlar oʻrtasidagi jahon chempionati oʻtkazilmoqda. Unda 67 ta mamlakatdan 600 nafarga yaqin sportchilar ishtirok etishi kutilmoqda. Musobaqani tomosha qilish uchun kelganlarga kirish bepul.
5−10-noyabr kunlari Oʻzbekiston poytaxti aralash jang sanʼati sport turi (MMA) boʻyicha yoshlar va oʻsmirlar oʻrtasidagi jahon chempionatiga mezbonlik qiladi. Milliy aralash jang sanʼatlari assotsiatsiyasi matbuot xizmati musobaqa jadvali haqida maʼlumot berdi.
Turnir Humo arena muz saroyida 18−21 va 21−25 yoshdagi sportchilar oʻrtasida oʻtkaziladi. Bu uchun dunyoning 67 ta mamlakatidan 600 nafarga yaqin sportchilar hamda 208 nafar trener va boshqa mutaxassislar roʻyxatdan oʻtgan. Musobaqa 40 ta vazn toifasi boʻyicha oʻtkaziladi (erkaklar 24 ta, ayollar 16 ta vazn toifalari).
Oʻzbekiston aralash jang sanʼati ustalari jahon chempionatida toʻliq tarkib bilan ishtirok etadi.
Musobaqa dasturiga koʻra:
- 5-noyabr soat 11:00dan — 1/32-bosqich;
- 6-noyabr soat 11:00dan — 1/16-bosqich;
- 7-noyabr soat 11:00dan — ¼-bosqich;
- 8-noyabr soat 11:00dan — ½-bosqich;
- 9-noyabr soat 16:30dan — Kattalar oʻrtasida final bahslari;
- 10-noyabr soat 16:30 dan — Yoshlar oʻrtasida final bahslari.
Musobaqani tomosha qilishni istovchilar uchun kirish bepul.
