Zapravkalardagi narxlar boʻyicha maʼlumot beruvchi “Avto24” dasturi ishga tushdi

Energetika vazirligi yoqilgʻi quyish, gaz toʻldirish va elektr quvvatlash shoxobchalari haqida maʼlumot beruvchi “Avto24” ilovasi test rejimida ishga tushirilganini maʼlum qildi.

“Sir emas, har yili kuz-qish mavsumida avtomobil haydovchilar boshqalarga nisbatan koʻproq aziyat chekishadi. Ularning asosiy muammosi kunning sovuq paytlarida qayerda yoqilgʻi quyish yoki avtomobilini siqilgan hamda suyultirilgan gaz bilan toʻldirish mumkinligini aniqlashtirishning imkonsizligida edi. Va nihoyat endilikda bunday muammolarga barham beriladigan boʻldi”, — deyiladi vazirlik xabarida.

Energetika vazirligi hamda “Hududgaztaʼminot” tomonidan test sinovida ishga tushirilgan “Avto24” mobil ilovasi har bir hududdagi eng yaqin yoqilgʻi quyish, avtomobilni siqilgan yoki suyultirilgan gaz bilan toʻldirish va elektromobillar uchun quvvatlantirish shoxobchalarini topish, narxlarni taqqoslash, boriladigan manzil hamda vaqtni aniq rejalashtirish imkonini berishi aytilgan.

Isteʼmolchilar mazkur ilovani Android va iOS operatsion tizimi qurilmalari orqali bepul yuklab olishi mumkin.

Ilova avtomobil egalariga hududlardagi barcha yoqilgʻi hamda quvvatlash shoxobchalarini bitta xaritada tezda topish, real vaqt rejimida hozirgi vaqtda mavjud yoqilgʻining narxi, zaxirasi va qulayliklari haqida aniq maʼlumotga ega boʻlish, elektromobil egalari uchun maxsus quvvatlash punktlarining lokatsiyalarini aniqlash singari imkoniyatlarni taqdim etadi.

Shuningdek, isteʼmolchilar ilova orqali oʻzlariga maʼqul “zapravka”ning reytingini koʻtarish, yoqilgʻi sifati hamda narxi haqida sharh qoldirishi ham mumkin boʻladi. Mobil ilova dasturi avtomatlashtirilgan holda yangilab boriladi.