Январда Ўзбекистонда -20 даражагача совуқ бўлиши мумкин
Маълум бўлишича, 2025 йил январ ойининг биринчи ўн кунлигида Ўзбекистон ҳудуди бўйича аномал совуқ ёки аномал илиқ шароитлар кутилмайди. Бу ҳақда Ўзбекистон Республикаси Гидрометеорология хизмати маркази (Ўзгидромет) хабар берди.
Дастлабки прогнозларга кўра, 1-январдан 10-январгача ҳаво ҳарорати кечалари -3...+2°, кундуз кунлари +3...+8° ни ташкил этади. Мамлакатнинг шимолий ҳудудларида кечаси -3 дан -8° гача совуқ бўлиши мумкин, кундузи ҳарорат 0 дан +5° гача ўзгариб туради.
Кейинчалик ой охиригача ҳарорат кечаси +3...+8° дан -3...-8° гача, шимолда -10...-15° гача; кундузи +10...+15° дан -2...+3° гача ўзгариб туриши кутилмоқда.
Синоптиклар, шунингдек, кириб келаётган йилнинг биринчи ойи давомида қисқа муддатли -10...-12 даража совуққача, республиканинг шимолида эса -17...-20 даража совуққача бўлишини прогноз қилмоқда.
Ойнинг айрим кунларида ёғингарчилик (ёмғир, қор) кутилмоқда.
