O‘zbekistonda muammoli kreditlar hajmi oshmoqda
Markaziy bank e’lon qilgan ma’lumotlarga ko‘ra, O‘zbekistonda muddati o‘tgan kreditlar miqdori yildan-yilga ortmoqda. 2025-yil 1-iyun holatiga kelib, mamlakatda bunday kreditlarning umumiy qiymati 23,52 trillion so‘mga yetgan. Bu ko‘rsatkich o‘tgan yilning shu davrida 20,93 trillion so‘mni tashkil etgan edi. Demak, bir yilda muammoli kreditlar hajmi 2,6 trillion so‘mga ko‘paygan.
Ushbu raqamlar bank tizimidagi umumiy kredit portfelining 4,1 foizini tashkil etadi. Mamlakat bo‘ylab jami ajratilgan qarz miqdori 567,7 trillion so‘m bo‘lishiga qaramay, ularning bir qismi o‘z vaqtida qaytarilmayapti. Ayniqsa, davlat ulushi mavjud tijorat banklari bunday kreditlar ulushida yetakchilik qilmoqda — ularga to‘g‘ri kelgan muammoli qarzlar 15,76 trillion so‘mni tashkil etgan.
Muammoli kreditlar bo‘yicha eng katta ko‘rsatkich O‘zmilliybankka to‘g‘ri keladi — bu yerda 3,2 trillion so‘mlik qarzlar hali ham undirilmagan. Undan keyingi o‘rinda Agrobank turibdi — bir yil ichida bu bankdagi muammoli qarzlar hajmi 2 trillion so‘mdan 2,96 trillion so‘mga oshgan. O‘zsanoatqurilishbankda esa bu raqam 2,57 trillion so‘mni tashkil qilmoqda.
Shunga qaramay, ayrim banklarda ijobiy o‘zgarishlar ham kuzatilmoqda. Jumladan, Biznesni rivojlantirish banki 2024-yil iyunida 2,84 trillion so‘m muammoli kreditga ega bo‘lgan bo‘lsa, joriy yil boshida bu ko‘rsatkich 1,85 trillion so‘mgacha kamaygan. Bu — bir yilda sezilarli pasayishni anglatadi.
Qolgan yirik banklar orasida Asaka bank — 1,92 trillion so‘m, Xalq banki — 1,2 trillion so‘m va Mikrokreditbank — 1,27 trillion so‘m miqdoridagi kreditlarni hali ham qaytarib ololmagan. Bu esa bank sektorida barqarorlik va kredit siyosatini takomillashtirish zarurligini ko‘rsatmoqda.
O‘xshash mavzular
