“Sevgi iztirobi”: kutilmagan finalga ega serialni ko‘rishga arziydimi?

“Sevgi iztirobi” seriali sharhi

Bu serial bir-biriga zid tushunchalarni birlashtirgan loyiha, unda muhabbat va nafrat o‘rtasida bir qadam bor, xolos.

Hammasi turk kinosi klassikasi asosida boshlanadi: Istanbulda yashovchi ikki oshiq yurak va ijtimoiy tabaqalar orasidagi tafovut. Qiz – badavlat tadbirkorning qizi, yigit esa – oddiy sartaroshning o‘g‘li. Ular o‘z dunyolari o‘rtasidagi farqlarini yenga oladilarmi? Muhabbat sinovlariga bardosh bera oladilarmi? Ana shu savol serial davomida tomoshabinlarni qiziqtirib turadi.

Qizig‘i shundaki, hikoya davomida syujet ham, qahramonlar hayoti ham tubdan o‘zgaradi. Yigit muvaffaqiyatga erishadi, qizning esa hayoti umuman boshqa yo‘nalishga buriladi.

Serialning asosiy ijobiy jihati – qahramonlarning murakkab xarakteri. Dastlab yaxshi ko‘rib, yaxshi deb hisoblagan qahramonlar oxir-oqibat sizni ajablantirishi mumkin – ularning niyatlari boshqacha chiqadi. Ijobiy obrazlar ham xato qiladi. Aslida ular boshidan shunday edimi yoki shunchaki niqob taqqan edimi?

Emotsional syujet – yoningizda ro‘molcha tayyor tursin, chunki serialda yig‘lashga majbur qiladigan lahzalar juda ko‘p. Shu bilan birga, sahnalardagi hissiyotlar ba’zan shunchalik chuqurki, tomoshabinlar ssenariy mualliflarini shafqatsizlikda ayblashadi.

Ajoyib saundtrek – oddiy quvnoq turk musiqalari o‘rniga, fonda Yevropa uslubidagi yurakni o‘rtaydigan qo‘shiqlar yangraydi.

Estetik go‘zallik – serial vizual tomondan ham hayratlanarli – qahramonlarning uslubi, interyer dizaynlari va Istanbulning betakror manzaralari. Hatto sayohatga chiqish istagi uyg‘onadi.

Ammo shu bilan birga, serialning kamchiliklari ham yo‘q emas. Ba’zi tomoshabinlar aktyorlarning ortiqcha dramatizatsiyasidan shikoyat qilgan, ayniqsa bosh qahramon qizning ortiqcha o‘ynashi haqiqatga mos kelmagan. Bundan tashqari, ba’zi ikkinchi darajali qahramonlar to‘satdan g‘oyib bo‘lgan, ularning qayerga ketgani tushuntirilmagan.

“Sevgi iztirobi”ni ko‘rishga arziydimi?

Agar har doim yaxshi yakun bilan tugaydigan, yengil seriallardan charchagan bo‘lsangiz, “Sevgi iztirobi” aniq sizga mos keladigan serialdir. Chunki bu serialning oxiri realistik bo‘lmasa ham, juda hayotiy hisoblanadi. U insonlarga har bir daqiqani qadrlash va hozirning o‘zidayoq yashash kerakligini eslatadi.

Bosh rol ijrochisi Burak Ozchivitning o‘zi ham bunday finalga tayyor bo‘lmaganini tan olgan:

“Tomoshabinlar bunday finalni xohlamasligini men bilardim. Men ham buni istamagan edim. O‘shanda men “Mening qahramonim Kamol bunga loyiq emas” degan edim. Ikki variant bor edi: baxtli yoki baxtsiz yakun. Biz esa umr bo‘yi eslab qolishadigan final qilishni xohladik. Shunday ham bo‘ldi.”