“So‘nggi 10 yil ichida men oilamizning asosiy boquvchisiman”: Kattako‘rgonlik o‘z-o‘zini band qiladigan kosmetolog hikoyasi

Irodaning go‘zallik sohasidagi yo‘li bolaligidan boshlangan. O‘shanda u kosmetologiyaga qiziqishini anglagan: uy sharoitida yuz uchun niqoblar qilgan, kremlar surtishni yaxshi ko‘rgan va onasining parvarish jarayonlarini tomosha qilgan. Aynan onasi unga ilhom manbai bo‘lgan.

“Men har qanday qiz kabi qiziqqon edim va onamdan niqob surtishni o‘rgatishini so‘rardim. Katta bo‘lgach, go‘zallik olamiga oid ma’lumotlarni izlay boshladim: jurnallar o‘qirdim, nafaqat yuz, balki soch, qosh, kiprik uchun ham retseptlar topardim. Hammasi shunday boshlangan edi”.

Yillar o‘tib, allaqachon turmush qurgan paytida, Iroda tasodifan estetik kosmetologiya maktabining reklamasiga ko‘zi tushadi va kosmetolog bo‘lish g‘oyasi bilan qiziqib qoladi. Biroq bu — pul ishlash uchun emas, balki shunchaki o‘zini rivojlantirish uchun bo‘lgan istak edi.

“Uy bekasi edim, uyda o‘tirib zerikib, sevimli ishim bilan shug‘ullanishni xohlardim. Kim bilibdi deysiz, yillar o‘tib men shunchalik ko‘p mijozlarga ega bo‘laman va yaxshi daromad topa boshlayman deb”.

Irodaning fikricha, kosmetolog kasbini noldan boshlab bir necha oy ichida o‘rganish mumkin, faqat agar bunga butun kuchingizni sarflasangiz. U o‘z muvaffaqiyatining kalitini katta istak, ishiga bo‘lgan muhabbati va o‘z ustida ishlash — ya’ni tinimsiz o‘rganish, master-klasslar va go‘zallik trendlarini kuzatishda ko‘radi. Shu bilan birga, albatta, yillar davomida keladigan tajriba.

“Tibbiy ma’lumot bo‘lmasa ham kosmetolog sifatida ish yuritish mumkinmi? Bu savolga aniq javob berish qiyin. Hech bo‘lmaganda yuz anatomiyasini bilish uchun kurslarga qatnashish kerak. Masalan, Toshkentdagi Pirogov institutida. Ammo bu yerda har kim o‘zini sharoitidan kelib chiqqan holda qaror qabul qiladi”.

O‘z-o‘zini band qiladigan kosmetologning daromadi

O‘zining hunari foydalimi degan savolga Iroda qat’iy javob beradi: bu judayam foydali ish, garchi hozirda “modaga aylangan” bo‘lsa-da. Marketing o‘z ishini qiladi, ba’zi ustalar esa uzoq o‘qishni istamaganidan bu sohaga faqat pul uchun kiradi va ba’zida “zarar yetkazmaslik” prinsipini unutadi.

“Ha, bu, albatta, daromadli ish. O‘z tajribamdan shuni ayta olamanki: 13 yildan beri shu soha bilan shug‘ullanaman va so‘nggi 10 yilda oilamizning asosiy boquvchisiga aylandim. Bu holat o‘zi juda ko‘p narsani anglatadi”.

Aslida daromad mavsumga, mijozlar soniga va insonning o‘zi ishlashga qancha tayyorligiga bog‘liq. O‘rtacha hisobda o‘z-o‘zini band qiladigan kosmetolog oyiga $1000 dan $5000 gacha daromad topishi mumkin. Biroq bu daromaddan materiallarga ketadigan xarajatlarni chiqarib tashlash kerak — ular esa arzon emas.

O‘z-o‘zini band qilish haqida

O‘z-o‘zini band qilishni Iroda kosmetologiya bo‘yicha kollejda dars bergan davrida rasmiylashtirgan. Ushbu maqom uning ishini qonuniylashtirishda eng qulay va oddiy yechim bo‘lgan, shuningdek, soliq organlaridan hech qanday savollar bo‘lmasligi uchun u shunday yo‘lda ishini davom ettirishni istagan. Bu maqom unga kosmetolog sifatida ishlash bilan birga o‘qituvchilik faoliyatini ham rasmiy ravishda olib borishga imkon bergan.

Kosmetologning fikricha, o‘z-o‘zini band qilishning afzalliklari: sevimli ishingizni asosiy ish bilan uyg‘unlashtirish va qo‘shimcha daromad olish imkoniyati. Kamchiliklariga esa u doimiy bandlikni kiritadi: ish vaqti tugaganidan so‘ng ham dam olmaysiz — o‘rganishda yoki ikkinchi kasbingiz bo‘yicha ishlashda davom etasiz.

O‘z-o‘zini band qilganlarning reklama qilish yo‘li

Irodaning holatida hammasi “og‘izdan-og‘izga” usuli bilan boshlangan. Chunki u yashaydigan shahar — Samarqand viloyatining Kattako‘rgon shahri kichik bo‘lib, bu yerda deyarli hamma bir-birini taniydi.

Bugungi kunda kosmetolog ijtimoiy tarmoqlarning kuchini yaxshi anglaydi va o‘z ishlarini mamnuniyat bilan Instagram sahifasida ulashadi. U yerda u o‘z auditoriyasini shakllantirgan va ularning ko‘pchiligi doimiy mijoziga aylangan.

“Ijtimoiy tarmoqlar hozirda eng muhim reklama vositasi. Shuning uchun o‘z ishlarimni joylab boraman — bu ishimning rivojlanishiga ijobiy ta’sir qiladi”.

O‘z ishini endi boshlayotgan va imkoniyatlariga ishonmayotgan o‘z-o‘zini band qiladigan kosmetologlarga kosmetologning maslahati oddiy, ammo ilhomlantiruvchi:

“Oldingizga maqsad qo‘ying va unga intiling. O‘zingiz ustingizda ishlang va doimo o‘rganishda davom eting. Eng muhimi esa, albatta, ishingizni sevib bajaring — shunda har qanday xavf o‘zini oqlaydi”.